हावाहुरीबाट २५ भन्दा बढी पोल ढल्यो

बीरगंज । बीरगंज महानगर क्षेत्रमा गएराति (बुधबारराति) देखि अवरुद्ध विद्युतको आपुर्ति सुचारु हुन समय लाग्ने नेपाल विद्युत प्राधिकरण बीरगंज वितरण केन्द्रले जनाएको छ।

गएराति करिब साढे १२ बजेतिर वर्षासहित आएको आँधीहुरीका कारण ठाँउ-ठाँउमा विद्युतको पोल भाँचिएर लडेको र केही ठाँउको ट्रान्फर्मर पनि खसेपछि वीरगन्ज महानगर क्षेत्रमा विद्युत आपुर्ति सेवा अवरुद्ध छ।

विद्यूत प्राधिकरण बीरगंज वितरण केन्द्रका प्रमुख अवधेशकुमार दुबेका अनुसार, रातिको आँधीहुरीले बीरगंज महानगरका विभिन्न स्थानमा गरी करिब २५ वटा विद्युतको पोल भाँचिएर ढलेका छन् भने लालपर्सा र रतनपुरमा ट्रान्फर्मर नै पोलबाट खसेर क्षति भएको छ। बीरगंज ३० लालपर्सामा मात्रै १० वटा पोल भाँचिएर ढलेको उनले बताए। यस्तै बीरगंजको पावरहाउस चोकमा पनि ५ वटा पोल लडेको जानकारी उनले दिए।

जसका कारण बीरगंज महानगर क्षेत्रमा राति साढे १२ बजेदेखि नै विद्युत सेवा अवरुद्ध भएको हो। ठाँउ-ठाँउमा ढलेका पोल , तार र ट्रान्सफर्मर मर्मतको काम बिहानैदेखि सुरु गरिएको र अहिलेपनि प्राविधिकहरु त्यसमै लागि रहेको दुबेले बताए।

मर्मत सम्भारको काम चलिरहेकाले अवरुद्ध विद्युतको आपुर्ति सम्वत आज बेलुकीदेखि सुचारु हुने सम्भावना रहेको दुबेले बताए। उनले भने, ‘प्राधिकरणका प्राविधिक र कर्मचारीहरु बिहानैदेखि खटेर काम गरिरहेका छन्। अन्यस्थानमापनि पोल र तारमा क्षति भएको खबर आइरहेको छ। त्यसका कारण विद्युत आपुर्ति सुचारु हुन समय लाग्छ।’